今次選委會選舉中，民主派喺法律界大獲全勝，一啲界內有頭有面兼名氣響噹噹嘅大狀例如清洪同胡漢清等，竟然都輸咗畀啲初出茅廬嘅小妹妺同小弟弟，例如陳淑莊Tanya同郭榮鏗，真係後生可畏。
Tanya接受商台節目《無底深談》訪問時講番個結果都話好意外，事關真係冇諗過會贏。佢話自己入大學時，其實想讀政治多啲，但阿媽好似唔多鍾意，叫阿女諗清楚啲啦，不如讀法律啦。喺單親家庭長大嘅Tanya係乖乖女，覺得媽咪已經受到好大壓力，無謂令佢唔開心，所以最終聽佢話讀法律啦。
備受公民黨四大狀賞識嘅Tanya話，之前見到佢哋四個，就好似小學生見校長咁，會立正㗎；後尾熟絡就覺得大家都好nice。既然咁欣賞四大狀，唔知會唔會步佢哋後塵選立法會呢？