梁大狀敢逆中央旨意，出嚟參選特首單挑煲呔，真係勇氣可嘉，難怪咁多選委會選民都投咗民主派候選人一票，決意要保送梁大狀入場玩吓。
唔知係咪見到泛民手握過百票係威係勢，令到唔少高官都眼紅甚至恐懼。所以梁大狀早前發表佢嘅教育政策政綱時，最鍾意同議員互片嘅教統局局長李國章就即刻反擊，話梁大狀只係撈政治油水，慌死踩少梁大狀一秒都會助長佢嘅聲勢咁。
噚日梁大狀出席一個教育論壇時，提起呢件事時就不怒反笑，話證明佢哋選特首效果初見，至少政府當佢係一個對手嚟反駁嘛。不過，佢希望今次係君子之爭，唔想出現任何謾罵式辯論咁無品，更點名話李國章一向鍾意巧言辯駁，好似以為自己講嘅嘢就一定啱咁；難怪有傳煲呔都要out咗李國章，留佢喺度日日同自己駁嘴，仲使撈嘅？