年僅10歲嘅鋼琴神童沈靖韜,之前已經揚威海外,講到本地賽梗係佢嘅囊中物。小神童噚日參加麥當勞麥樂會同通利音樂基金會首次合辦嘅「香港傑出青少年音樂家大獎2006」,打低1,600位參賽者,首先奪得鋼琴公開組冠軍,之後同敲擊組、弦樂組、管樂組三位公開組冠軍激鬥,最後攞埋全場總冠軍、即青少年音樂家大獎。
韜韜身經百戰,噚日嘅對手年紀全部大過佢,好多人又係演藝學院學音樂嘅師兄師姐,但韜韜並唔緊張,喺屋企施施然睇完卡通片之後,先去參加比賽。小神童12月27號喺大會堂仲安排咗一場音樂表演,睇嚟佢今個聖誕假期都唔可以好似其他小朋友咁全情玩樂囉!