國泰同微軟有乜關係？等八方話你知，唔少人投考國泰機師之前，都會不停打機熱身，最熱門嘅打機遊戲係微軟嘅電腦遊戲軟件《FlightSimulator》（模擬飛行），模擬揸住架波音747起飛同降落。事實上，唔少國泰飛機師私下都鍾意玩呢款遊戲機。有機師好坦白咁話，熟玩FlightSimulator，某程度熟晒駕駛艙嘅儀器，對面試的確有啲幫助。
國泰新一期《國泰天地》就好罕有咁推介微軟嘅FlightSimulator，又吹捧呢套遊戲最流行嘅版本入面，有24,000個模擬機場可供升降。微軟呢套軟件推出成20幾年，照計唔會呢個時候搵國泰賣廣告，唔通國泰係想投考機師嘅應徵者操fit啲先嚟應考？