唔少高官退而不休，但耆康會話，普羅市民打咗一世工，唔少人退休之後就好唔適應，覺得失落、脾氣變得暴躁兼容易患上抑鬱。
現年70、喺鏞記打咗23年工嘅黎永成，退休前係部長，曾服侍唔少名人高官，好似因為腳痛辭職嘅前特首董建華、末代港督彭定康、前警隊一哥李君夏等等。董建華鍾意食叉燒、彭定康鍾情紅燒石斑尾，一幕一景黎伯都好記得。李君夏當年見黎伯誠實兼有禮，仲想挖角請佢做自己嘅家庭司機。可惜當時黎伯未有車牌，轉行失敗。
黎伯唔似得董伯伯退休優哉游哉，佢噚日出席耆康會記者會時話，退休後自己好失落，成個人脫晒節，患過抑鬱又試過自殺，要幾經辛苦先擺脫退休後遺症，同大班兒孫共敍天倫。睇嚟，識得點去享受退休生活，有時都係一種福份。