亞視劇集《義無反顧》女主角之一劉綽琪，早前投訴遭海俊傑性騷擾，指男方借意約佢去夜店，又摸又攬，開工嗰陣仲不時播手機裏面嘅「鹹濕四仔」畀佢睇。同劇嘅吳亭欣都開火炮轟，話同海俊傑拍攝一場強姦戲時好逼真，搞到佢拍完之後留下心理陰影，要睇心理醫生。
承認睇四仔
噚日性騷擾事件三位主角齊集馬鞍山廣場造勢，海俊傑表現得若無其事，反而劉綽琪就刻意同海俊傑保持距離，記者搵佢兩個合照時，劉綽琪即耍手擰頭掉頭走。
事後劉綽琪澄清話冇尷尬，佢話：「如果係，都係佢尷尬啲，不過我見到佢都避之則吉。我曾經做過《警訊》主持，我想借我呢件事提醒其他女仔要小心啲！」反而吳亭欣就明顯唔敢講太多，只係話：「係海俊傑專業，演技逼真，佢帶我入戲，又唔教我抽離，先係咁！」
海俊傑否認性騷擾劉綽琪，但佢話：「如果睇四仔係一種性騷擾，我道歉，講唔好意思。」佢又暗示劉綽琪博宣傳：「件事7月嗰陣發生，性騷擾係刑事，唔報警，大家可以在時間性上面諗吓！」此外，吳亭欣前晚以金色裙打扮，出席周潤發同鞏俐嘅新片《滿城盡帶黃金甲》首映，認真應景。
