黑起上嚟真係唔到你唔信！我求大俠講緊嘅係阿仙奴，兵工廠喺上周六英超聯，主場只係同樸茨茅夫打成2:2；爭標希望渺茫過渺茫之餘，領隊雲格繼較早前被足總罰款1萬鎊（約15.3萬港元）後，今次半場又被球證驅逐，中場龍格保又勇戰受傷，肯定錯過聖誕聯賽快開車㖭！
兵工廠今季新球場阿聯酋好似唔多利主隊，事關球隊聯賽主場已失咗10分；對住賽前被睇低嘅「樸茅」亦先失兩球，及後由後備入替嘅艾廸巴約同基拔圖施華各入一球，先迫和客軍2:2，執番1分！但壞消息就一籮都裝唔晒，好似雲格繼之前被罰款後，今次又半場被逐，佢賽後承認同球證喺球員通道的確有爭拗，仲晦氣反問係咪要拉佢去坐監先開心？
亨利獲報章選為歐洲最佳
同時，剛復出冇耐嘅中場龍格保呢場6分鐘傷出，聖誕同新年檔期都唔使預佢玩，呢鋪都算「杰撻撻」！「樸茅」領隊哈利列納賽後仲寸寸貢：「贏波我哋當然開心，但輸波都會欣然接受；但有啲人就輸打贏要，覺得自己係頂班馬，將贏輸睇得太重。」
衰到貼地時，都會有啲好嘢嘅，例如王牌射手亨利自言明年1月將復出，喺足總盃惡鬥利物浦時披甲；而且佢雖然喺歐洲同世界足球先生選舉食白果，但就被克羅地亞一份報紙選咗佢係歐洲最佳球員，算係拎番個安慰獎。
「老實講，阿仙奴今季要同曼聯或車路士爭聯賽真係有啲不切實際，惟有努力打好盃賽……同埋雲格真係要收收火喇！」