前晚在會展的亞洲遊戲展，舉行慈善演唱會，由陳子聰等人組成的六人組合「廿四味」，公然在小朋友面前連續唱三首粗口歌，還指觀眾冇反應似「墳墓」。事後何超儀力撐老公，指他「連廣東話都講唔正，鬼知佢唱乜」，而黃貫中則稱「唔怕啦，嚟得打機嘅都係死仔包」。
黃貫中（Paul）、何超儀、陳子聰和兩位前LMF成員等組成的六人男子組合「廿四味」、藍奕邦、Rosemary等前晚在會展的亞洲遊戲展內舉行《狂人電玩夜慈善演唱會》。全晚以何超儀和黃貫中出場時反應最熱烈，Rosemary雖然以短裙上陣，但她和藍奕邦出場時台下觀眾都無甚反應。
「呢度係墳墓」
廿四味出場時唱了三首歌，每首都包含粗口和粗俗語言，包括「X你老X」、「fxxk」、「頂你個肺」、「X」，甚至連潮州粗口都唱埋，遊戲展現場有不少小朋友在場，廿四味似有教壞細路之嫌。由於現場反應冷淡，陳子聰又指着前排的觀眾說：「呢度係墳墓嚟嘅咩？後面啲觀眾拍吓手掌啦，20蚊嚟睇騷重唔拍掌！」
何超儀事後表示支持老公陳子聰，她說：「總之我支持佢哋啦，現場啲人鬼聽到咩，佢哋廣東話都講唔正，鬼知佢唱乜。佢哋出碟我都有幫手唱兩嘴，都有興趣同佢哋合作。」
想賭王齊插水
提及父親何鴻燊前日農曆生日，超儀說：「掛住做騷唔記得㖭，我會送自己、阿Paul同埋陳奕迅隻碟畀佢做禮物，我都希望爹哋可以嚟睇我表演，我想親自插水落佢懷抱，仲想佢插埋水㖭。」
黃貫中也表示廿四味在場唱粗口歌冇問題，他說：「唔怕啦，嚟得打機嘅都係死仔包，唱粗口歌係唔啱，但不得不承認有時講粗口係好爽，不過喺長輩同斯文人面前會收斂。」
問面對朱茵會否講粗口，他說：「我唔慣喺女人面前講粗口，同佢嗌交都唔會，我奉勸大家同女人嗌交千祈唔好嗌贏，否則俾人講足30年。我睇唔起啲人將脾氣發洩喺女人同小朋友身上。」大會公關則表示事前不知道廿四味唱粗口歌，他們會作事後檢討。
採訪：駱華齡 攝影：陳順禎
