林海峰（林狗）今年中夥葛民輝舉行軟硬天師七場紅館騷，勁袋逾千萬酬勞，前晚他標尾會，撇甩傳不和的阿葛，單拖到灣仔會展舉行一連六場的「林海峰...是但噏踎低噴飯」，以閒話吹水feel譏盡娛圈及政壇百態之餘，更將四大王天擺上台，嘲張學友深閨有產後抑鬱、黎明有社會焦慮症，又笑郭富城高攀熊黛林、劉德華和梁朝偉應聯同其他五虎成員做大官等等，令在場逾7,000觀眾笑爆嘴。
林海峰前晚舉行的棟篤騷全長兩個多小時，捧場者有其父母、胞姊林珊珊、太太彭羚、老友蔡一智夫婦和谷祖琳等。開場時，林狗從山頂位出現，染了一頭金髮的他踏上放滿由他設計的Lambear熊舞台上後，便展開連場吹水，當中五大抵死位最惹人發笑：
1.嘲學友黎明有怪病
「𠵱家啲藝人全部有病，早排張學友做軟硬演唱會嘉賓，唱完歌唔肯走，好似陳水扁咁叫極唔落台，呢個爹哋應該好少出街，因為佢好驚人偷拍佢，我懷疑學友有產後抑鬱症。黎明都有病，佢做演唱會嘉賓時，唱晒成首快歌都企喺度唔郁，佢最馳名嘅蛙手都唔見，同當晚觀眾完全配合唔到，我懷疑黎明有社會焦慮症。」
2.挖苦城城獨臂巨星
「呢個係天皇巨星、舞台王者郭富城，阿城做軟硬嘉賓，教我哋做《對你愛不完》嘅動作，佢做呢個動作可以做好耐，我懷疑佢屋企冇坐廁、得尿兜，我懷疑佢沖涼都一隻手攞住劇本。」此時林狗大唱「IbelieveIcanfly，IbelieveIcantouch……熊黛林！」再做出龍爪手動作，登時令全場爆笑。
3.無綫五虎組新班子
「劉華係好典範，話你好劉華，即係不屈不撓。以後人民共和國要改名成劉華共和國，招聘廣告唔使資歷、識普通話，係招聘劉華一名。劉華應該競選特首，介紹新班子時，黃日華做衞生福利局局長，因為個人夠老實，可以睇住食環署；苗僑偉做律政司；睇湯鎮業嘅身形（指對方拍攝纖體廣告）都知佢取代何志平，梁朝偉『你嚟唔嚟澳門呀？我有多張船飛呀。』佢係財爺。」
4.官恩娜勁過麥當娜
「香港娛樂圈唔接受強者，只接受弱者同受害者，香港唔可以有麥當娜（Madonna），只可以有官恩娜，因為佢係一個受害者，佢喺新城活動被人咀10秒，呢件事之後，觀眾好鍾意上YouTube，睇佢俾人恐怖襲擊嗰段片，hitrate好高，啲人鍾意睇受害者，阿嬌（鍾欣桐）、肥姐（沈殿霞）同埋欣宜，欣宜係香港開埠以來，全港集體虐兒案唯一一個受害者。」
5.志雲警局講真心話
「呢行好彩有個好醫生，好多藝人上去輪街症，呢個叫志雲醫生，啲人睇親佢，都將入面屈埋屈埋嘅嘢講出嚟，Kelly（陳慧琳）講到喊晒，新特首又上去，唔應該叫《志雲飯局》，應該叫《志雲警局》，啲人一上去就講真話。」
採訪：李珮洳 攝影：陳偉權
