曼聯今季暫時成為聯賽「作客王」，8場作客取得7勝1和，18個入球更冠絕英超；而紅魔可怕之處，是比賽愈到尾聲入球愈多，作客入球超過6成來自比賽最後30分鐘。
朗尼未嘗連續入波
一般球隊作客，受到主隊球迷「招待」，加上受舟車勞頓之苦，比賽愈到尾聲，愈易被對手控制戰局，甚至失波；不過曼聯今季卻顯示強橫後勁，屢見比賽末段入波，18球之中，有11球是在61至90分鐘內取得，包括作客米杜士堡及錫菲聯，均憑末段入球奠勝，另作客雷丁，憑基斯坦奴朗拿度73分鐘的入球扳平；喜歡下注「即場主客和」及「即場波膽」球迷宜備忘。
曼聯近期當銳，與一對箭頭有關，朗尼已累積8個入球，暫列英超神射手第3位（未計上周六賽事），沙夏亦連續兩仗有波入；不過翻查曼聯今季入球紀錄，「朗尼仔」未嘗連續兩仗有波入，既然朗尼上仗對曼城的打吡戰已見取得「首球」，信數據的波友，今仗一於大膽剔除這位首球大熱門。
文：牽牛