自從去年法國嘅《小企鵝大長征》（EmperorJourney）美國勁收6億港元兼贏埋奧斯卡最佳紀錄片獎之後，電影公司班大爺已經發現肥頭得意嘅企鵝係勁有market，雖然呢輪已經有大把以動物做主角嘅動畫片出現，但《踢躂小企鵝》（HappyFeet）竟然成功打低《新鐵金剛智破皇家賭場》（CasinoRoyale），連續三個禮拜成為美國票房冠軍，你都咪睇小呢班呆頭呆腦嘅企鵝仔。 撰文：戶川淳
今個星期四（21號）正式喺本地上映嘅《踢躂小企鵝》，由片名到片中嘅企鵝造型都令人有一種心花怒放嘅開心感覺。雖然班企鵝係來自同我哋距離好遠嘅南極，但佢哋畀人嘅感覺就好鬼親切。
大唱經典情歌
多得曾經拍過《寶貝小豬嘜2》（Babe:PigintheCity）嘅導演佐治米勒（GeorgeMiller）將企鵝擬人化，用佢哋嚟講愛情、人生同生存價值觀，娛樂之外又有阿爸阿媽最想小朋友聽嘅正面訊息，所以啱晒一家大細。
故事裏面嘅南極企鵝亦鬼馬到係唱披頭四(TheBeatles)、皇后樂隊（Queen）同StevieWonder嘅歌嚟向異性求愛，不過小企鵝主角萬寶就天生唔識唱歌，淨係識跳踢躂舞，唔激死老竇老母，都嚇親啲少見多怪嘅街坊，將佢視為異類，不過萬寶就以自己嘅舞步譜出偉大愛歌，搵到自己嘅真愛，仲一樣明白天生鵝才必有用嘅道理。
配音陣容強勁
導演仲好認真咁同動畫師去過幾次南極做資料搜集，淨係影相都影成八萬幾張，美版仲有《魔戒》（TheLordoftheRings）嘅伊利亞活（ElijahWood）聲演主角萬寶，佢老竇老母就係由曉治積曼（HughJackman）同妮歌潔曼（NicoleKidman）配音，仲有向來配親音都瘋狂出位嘅羅賓威廉斯（RobinWilliams）助陣，而香港版就有側田聲演主角，佢改做隻唔唱歌嘅企鵝，都算大突破啦。最緊要都係外國傳媒都預測套片攞硬奧斯卡最佳動畫，真係點可以唔睇？