黃伊汶花碌碌絲襪
「其實我每次出trip都會特別留意絲襪，呢對絲襪我一見就好鍾意，個花紋好靚，好似我𠵱家着住條黑色裙，再襯呢對咁花嘅絲襪，成個人即刻冇咁沉，而且我都幾捨得買絲襪，最貴嗰對試過成千蚊，係D&G嘅，因為我覺得一對靚嘅絲襪，可以着到女人對腳好修長，好有女人味。」
方力申落水能游錶
「我好鍾意收藏手錶，歐米茄嘅手錶都有七隻，每隻各有特色，我戴緊呢款係06年嘅Seamaster系列，成隻錶都落得水，啱晒我用，甚至連呢條皮帶都係防水。錶面選用橙色，非常搶眼，款式設計可以配襯運動型同好似今晚出席隆重場合都適合。我特別鍾情闊錶面，因為我隻手比較粗，功能就要好似Chrono有得計時。」
梁詠琪環環相扣鞋
「呢個牌子好特別，佢差唔多每對鞋款都有個扣，以前喺香港都未有得買呢個牌子，好似係近呢年先喺置地開第一間店，佢好有50、60年代嘅味道，無論高踭定平底鞋都好舒服，同埋啲款好襟着，之前我見過佢哋有對紅色鞋，好靚，不過要成萬幾蚊，真係唔捨得買，不過我就有買其他配件，好似手鏈、手袋仔咁，佢啲手袋都有個扣㗎。」
羅敏莊麖皮靴保暖
「呢對Converse係喺尖沙嘴Converse專門店度買，佢好得意，幾間專門店係賣唔同版嘅Converse，有韓國版、日本版，我呢對就係美國版，平時我係唔着Converse，今次係拍呢套劇先買，同埋我見到呢對有麖皮毛毛長筒Converse，我覺得好靚，好少見，呢個款仲有啡色，我都已經買咗。」
採訪、攝影：馬建華、胡比、楊潔雯
