兩年前首次去環球嘉年華，真係超開心，不過價錢貴，玩一個機動遊戲起碼三、四十蚊，結果大家淨係揀心水項目只係重點出擊；而女生大都係患咗「毛公仔極度狂熱症」，寧願擺晒所有「金幣」去玩有獎遊戲都唔願玩機動遊戲。相隔兩年，嘉年華再次喺添馬艦舉行，場內有70種機動遊戲同攤位遊戲，小記親身試過，最激係G-Force、跳樓機同極速大風車，易嘔度滿分，加上今次大會破天荒以入場費套票形式進行，換言之所有機動遊戲一個價錢，任玩！究竟玩邊幾樣先最抵？攤位遊戲又邊啲Game易攞獎？即刻出發啦！
記者：羅灝汶
攝影：陳盛臣
Model：Cody、Naomi
G-Force「衝出地平線」玩完即嘔
易嘔度：★★★★1/2★
名叫G-Force「衝出地平線」，全球就只係得有4架咁多，早前3屆環球嘉年華已經熱爆全城，不過今次更搞搞新意思，就係推出「瘋狂極速版」，8位玩家將會喺40米長嘅「機械臂」上，以時速85公里嘅高速作360度大旋轉，而整個遊戲大約要花3分鐘左右，今次「瘋狂極速版」G-Force就會產生相等2.4倍地心吸力（物理學稱為2.4G）嘅向心力，根據官方透露，舊版本都係2倍地心吸力左右。今次玩G-Force絕對係挑戰你嘅極限！
亞洲獨有極速大風車
易嘔度：★★★★
另外最「嘔」之選一定係亞洲獨有嘅極速大風車，3分鐘內大風車會將你高速反轉再反轉，而且容量特大，一次過可以坐30人，玩完之後個個都腳震震。如果大家怕玩以上咁激嘅遊戲，其實今次大會就由瑞士引入全亞洲最高嘅流動摩天輪，呢座有18層樓高嘅摩天輪，一次可載336人，單係造價已經高達4,600萬元，可以俯瞰整個香港海傍靚景，又可以轉個靚運，當然抵到爛啦。
唔想嘔玩摩天輪！
易嘔度：1/2★
跳樓機快海洋公園15公里
易嘔度：★★★★
另外注目超激遊戲當然唔少得跳樓機，跳樓機？相信有好多朋友喺海洋公園玩過，今次環球嘉年華引入係全港最快「極速跳樓機」，時速高達60公里，相較起海洋公園嘅跳樓機只有45公里，「極速跳樓機」真係快好多，只要2.5秒就喺40米高空極速到地，不過呢部跳樓機只會「跳一次樓」，唔會來回幾次，好彩任玩唔嬲，1日跳足你100次都唔怕。
攻爆!最易攞獎3攤位
一如以往，今年有大量攤位遊戲畀大家玩，例如打鐵鈴、射罐子、釣袋袋、四方城、珍寶圈圈等等共32個遊戲，全部有大、中、細公仔做獎品，全部都係女生最愛！玩遊戲除咗靠運氣，技術都非常重要，再加上識得揀選合適遊戲一定事半功倍啦！男士們不妨睇吓以下精選遊戲，一於去到殺盡所有特獎、大獎，送番隻大公仔畀女朋友一定冧死佢！
簡介：將手榴彈豆袋全力擲向鐵罐陣，只要能夠將全部鐵罐擊至台下，獎品就即時到手。
《蘋果》教路：呢個遊戲重點係力量，所以由男仔玩就比較適合，而且將所有鐵罐一次打下台，應該由最底層開始「攻擊」。
獎品：小熊維尼公仔
技巧：★★
力量：★★★★
簡介：考你手眼嘅協調度，將籃球投進籃內。
《蘋果》教路：技巧絕對重要，有打開籃球嘅朋友好有着數，切記籃球非常有「彈」力，唔好太用力，盡量射「穿針」波就好易得獎。
獎品：跳跳虎公仔
技巧：★★★★
力量：★★
簡介：360度環迴各個奶瓶都有不同獎品，只要成功將球投進巨型奶樽內，獎品就即刻擰走啦。
《蘋果》教路：技巧就是王道，盡量用「拋」嘅姿勢，用「投」球嘅姿勢必定失敗。
獎品：粉紅米妮老鼠
技巧：★★★
力量：★★
AIA香港環球嘉年華
地點：香港金鐘添馬艦廣場
開放日期：2006年12月15日至2007年3月25日（暫定）
開放時間：11am時至5pm（日場）6pm至11pm（夜場）
票價：成人
（一至五）日場$110、夜場$150
（六、日）日場$160、夜場$180
（假日）日場$200、夜場$225
小童及老人
（一至五）日場$75、夜場$95
（六、日）日場$100、夜場$180
（假日）日場$125、夜場$150
查詢電話：25458093