徐子淇和李家誠在澳洲舉行童話式世紀婚禮，令不少圈中人大表羨慕，其中包括曾和合和太子爺胡文新拍拖的袁彩雲和向來恨拍拖恨到發燒的容祖兒，連緋聞多多的鄧麗欣都流晒口水，惟獨是李彩華唱反調，不知她是否吃不到的葡萄是酸的。
採訪、攝影：李珮洳、顏英儀、魯萍
鄧麗欣：感覺開心
「我喺屋企睇到成個（婚禮）過程，覺得好開心，可以環遊世界，我流晒口水，因為我好鍾意歐洲。但我好傳統，會喺香港擺酒，度蜜月最好就係凍啲嘅地方。」
袁彩雲：似灰姑娘
「近日睇電視同報紙覺得佢（徐子淇）靚咗同高貴咗，就好似童話入面嘅灰姑娘咁。」有指李家的聘禮高達四億元，彩雲說：「如果真係畀到呢個價，咁代表子淇有佢嘅價值。」對於自己釣金龜失敗，她說：「愛情唔可以用錢衡量。」
李彩華：會冇自由
「可能睇得電視劇多，覺得嫁入豪門真係會冇自由嘅，我自己冇接觸過豪門嘅人，對鑽石王老五都冇研究。」
容祖兒：等待儍福
「嗰時合作拍《新鮮人》套劇已經覺得呢個女仔個樣好有福氣，我最欣賞佢係加入娛樂圈都冇放棄學業，而且成績仲好好。我又唔係好恨嫁入豪門，但係我覺得有時儍人儍福，話唔定我都會有呢個機會。」
