衞蘭投訴細孖衞詩：「妹妹會好懶，唔幫手打掃間屋，因為佢會掛住玩唔瞓覺！」
衞詩又投訴大孖衞蘭：「可能家姐始終係家姐，有時會唔畀機會人哋講，呢樣我就唔係好鍾意囉！」
同屬白羊座的衞蘭和衞詩，都擁有這火象星座的火爆率直個性，兩姊妹平日狗咬狗骨是指定動作，但畢竟流着同一樣的血，轉頭已經嘻嘻哈哈，永無隔夜仇。
這對雙生兒快人快語玩踢爆，衞蘭一語篤爆細孖貪靚仔、只需一頭型仔靚髮便可迷惑她；衞詩更是一針見血，爆大孖愛才子、要受得氣的男人才頂得住她的強悍。衞蘭和衞詩明明擁有心靈感應的神奇力量，但對另一半的要求和品味偏偏南轅北轍。
原來，雙胞胎在性格和擇偶這兩方面，可以是完全不一樣。 撰文：駱華齡
RoundOne玩踢爆
衞蘭：Janice 衞詩：Jill
篤姊妹缺點
‧Janice：有時妹妹會好懶，唔幫手打掃間屋，又唔會幫手做家務，但都會主動洗吓衫；至於性格上妹妹有時畀人覺得唔緊張工作，因為佢會掛住玩唔瞓覺，咁會影響第日唔夠精神工作。
‧Jill：可能家姐始終係家姐，所以佢會覺得自己講嘅嘢係啱，有時會唔畀機會人哋講，呢樣我就唔係好鍾意囉。
優點大放送
‧Janice：妹妹好識𠱁人開心，有時明明唔係佢做錯嘢，但佢會𠱁番你轉頭，等大家忘記晒唔開心嘅事，不過我哋鬧完交好快會冇事，嬲一個晚上第二朝又會好番，可能我哋兩個都唔係好識嬲人。
‧Jill：家姐好識得關心人，會明顯畀你知道佢關心緊你，如果佢知我唔開心，佢會安慰我，又會買嘢畀我食，雖然唔係好大件事，但都令我開心晒。
數心儀對象
‧Janice：妹妹一向鍾意靚仔，會以外表為先，好彩佢遇親嘅男仔都唔係花心，呢方面佢好幸運，反而我之前俾靚仔呃過，所以以後都唔會注重外表，最重要睇對方對我好唔好，畀到安全感我，當然都要有才華。
‧Jill：家姐會鍾意有talent（才華）嘅男人，就好似《NANA》裏面嘅松田龍平嗰種類型，但我就鍾意young啲同hiphop啲類型。
選至憎男士
‧Janice：我好唔鍾意嗰啲扮晒嘢嘅男仔，絕對係好cheap！好寸同冇gentleman都接受唔到，反而我覺得妹妹會最討厭唔識得打扮同唔識着衫嘅男仔。
‧Jill：佢唔鍾意同一啲同佢溝通唔到嘅男仔傾偈，特別係冇耐性嘅男仔，因為佢性格好強，如果佢搵男朋友，對方一定要受得到佢氣。我就最唔鍾意唔識得表達自己嘅男仔，仲有連自己都takecare唔到嘅男仔。
性感男地帶
‧Janice：我會睇對眼同腳，對腳一定要好靚，仲要啱成個身形比例，但一定要高過我，眼睛要電死人咁，最好係綠色眼珠，因為我鍾意mixmix哋嘅眼睛。我覺得妹妹會睇頭髮，因為一個髮型可以代表男仔嘅style，有時睇佢點整髮型都知道佢嘅性格。
‧Jill：我覺得家姐會留意對方嘅手或腳，如果手長腳長佢會欣賞，相反如果指甲好污糟圍晒黑邊就一定唔得，佢會頂唔順。至於我就會留意男仔嘅眼神同頭髮，可能因為自己頭髮唔係咁好，所以會特別注重，而且男仔識着衫，我又會覺得好型。
攝影：陳志嵐
場地提供：Suite,GatewayHotel（RM）
化妝：江中平@A&VMakeupSchool
髮型：BluedyWong@HairCulture
服裝提供：LaneCrawford
