超級型男「阿有」成名後，近年喺東洋發展麻麻，所以要回流返嚟香港拍戲，之不過同佢合作過嘅工作人員都對佢印象麻麻，事關阿有大牌得滯，樣樣都唔肯做，好似最近阿有接嗰部古裝片，又係呢樣唔拍，嗰樣唔拍，𠵱家連騎馬戲都要搵替身，以前佢都拍過唔少騎馬戲，𠵱家點解變得咁矜貴？
佢啲巨星派頭令到同戲嘅演員睇得唔多順眼，但佢哋覺得導演乜都肯就佢，佢哋當然唔會擺明唔妥佢，但心裏當然唔多老嚟啦！
阿有啲經理人又繼續咁縱佢，除咗當佢係金叵羅外，仲將佢招呼到成個荷李活巨星咁，亞洲記者想埋佢身，真係唔使諗，佢只會喺台上接受訪問，關仁有時都唔係好明白啲電影公司老闆同導演搵呢啲扮嘢演員拍戲係咪自己攞嚟衰，佢又唔多願做宣傳，票房又唔係好，片酬成百萬美金，用咁嘅價錢搵牛天王好過啦！
Textby關仁