上星期同十幾年無見面嘅小學同學聚會，當然大家都變咗好多。原來經過咁多年，我嗰日先發現自己不知不覺間已經變咗個交際高手，同班女同學當然話題不絕，無論係工作上、或者係戀愛層面，我都同佢哋講到收唔到掣。只不過嚟聚會嘅男生同女生之間，好似有一層隔膜。始終多年無見，仲要係異性，要打開話題真係唔容易。
不過，原來用足球呢種男人間嘅共同語言，要打破隔膜就簡單得多喇！「呢排有冇買波呀？」「有呀！噚晚買拜仁輸鬼死我……」據我統計，8成廿幾歲嘅男性當中有留意足球，而9成留意足球嘅男性，有參與足球投注，話題就係咁就打開咗。再加上酒酣耳熱，大家漸漸由唔出聲，到放開懷抱高談闊論！學識睇波，的確令我在交際上多一瓣招數。
愈來愈多女性參與
起初足球係男人嘅世界，但近年愈來愈多女性參與，做節目時收到唔少女觀眾打入嚟，佢哋嘅投注理據，比男性更深入！相信好快，足球唔再會只係限於男性先講喇！
WENDY
由歐國盃EuroBabes，變身球彩台受歡迎主持。