信和老闆黃志祥近期旺氣迫人，唔單止早排成功以19億元投得九龍塘廣播道一號地皮，佢家族旗下馬匹亦頻傳捷報。上個星期日國際賽日，佢名下嘅「喜利多」同乖女黃敏華名下嘅「獲利多」，同日齊齊爆出半冷，當日兩父女都冇入場拉頭馬；之不過噚日黃志祥就現身馬場，幫乖仔黃永光名下隻馬「厚利多」打氣，馬迷見黃志祥到場，「厚利多」獨贏賠率就愈賣愈熱，最後被捧成2.6倍大熱門，結果順利贏馬，連埋「厚利多」在內，三匹「利多」系馬今季全部有馬贏，黃志祥一家可謂威風八面。
黃志祥話上次要去參加選舉委員會投票，又唔記得提醒個女佢隻馬有份出賽，所以冇入場拉頭馬，好彩噚日抽到空入場，可以拉頭馬補數。