新人上場，最緊要係同隔籬左右搞好關係，教統局常任秘書長黃鴻超噚日出席「學生營商體驗計劃」，唔單止喺巡場時大買學生嘅自家設計品，仲大派貼士，搞到班學生狂讚佢nice！
70幾間學校噚日喺滙豐銀行總行大堂擺攤位，主要售賣自家設計同一針一線整嘅咕𠱸、袋、銀包等，班學生咁有心有力，搞到黃鴻超都即刻掏腰包買番幾件。佢首先去咗甘迺廸中心個攤位，學生設計咗兩款環保袋，佢就每款買兩個，之後又再去附近買兩罐種子雞蛋，本來45蚊兩罐，佢畀咗100蚊，話唔使找錢；去買咕𠱸同被袋，本來217蚊，佢又拎500蚊，都係唔使找……八方計過，其實佢只係買咗約300蚊嘅嘢，但就畀咗差唔多400蚊貼士，不過可以做到「皆大歡喜」，冇計喇！