論香港富豪人氣指數最高，呢期真係非李生莫屬……但唔係長實嗰個李生，係恒基個李四叔！唔計孻仔家誠結婚，淨講炒股賺200億被稱為亞洲畢菲特就夠巴閉！之不過，四叔究竟係咪真係稱得上新股神網民其實都幾有意見!
喺《香港討論區》裏面，網友大致上認為，近日四叔教人炒股其實都幾吹水！7ghk話：「教乜鬼吖，抽新股我唔識咩！」1225話：「有閒錢大晒，隻隻好嘢搵佢做股東、愈有就愈有。」kee007就話：「佢教我內部認購唔使抽仲好啦……」
而對於四叔引以為傲嘅「未沽過」論，kee07就咁睇：「佢大把錢使乜沽貨，IPO價連賬面上都未輸過，做乜要沽？」kee07認為：「佢只係贏一份勇氣，早過其他有錢佬大手入IPO股，基本上唔使乜買賣技巧。早已立於不敗之地，只係賺80億同100億分別！」
之不過就算大家唔認同四叔炒股心得，不妨參考吓佢嘅致富之道！四叔早前接受傳媒訪問嗰陣話，男人最怕入錯行，女人最怕嫁錯郎，如果想賺錢，選科個陣最緊要揀經濟、商科，人工一定會比其他行業高好多，而讀完書之後就唔好咁快結婚生仔，因為太早有家庭負擔就無得搏殺……當然最緊要係儲錢啦！