星期日FamilyDay，又係上酒樓歎吓一盅兩件嘅時候……咦！點解唔見晒我至愛嘅晶瑩剔透嘅蝦餃嘅？打聽之下，原來最近蝦兵蟹將海膽帶子頻頻「餃」革命，甚至想取代傳統蝦餃嘅地位，變成金魚游嚟游去……咁「餃」法，一於食晒佢哋落肚，睇吓佢哋有冇實力上位做點心王啦！
記者：趙佩倩 攝影：楊錦文
示範：日航酒店劉達明師傅
蟹粉蘆笋鮮蝦餃
價錢：$42/4件
需時：35分鐘
材料：澄粉1両、生粉1両、鮮蝦4隻、蘆笋苗2條、南瓜茸1杯、大閘蟹1隻、紹酒/薑粒/生蒜茸各少許
做法：先將蝦和蘆笋苗汆水，蘆笋苗切碎備用。將1份澄粉混入1/3份生粉，倒入1份滾水拌勻，然後再加入餘下的2/3份生粉，加入南瓜茸搓成橙色粉糰，待冷凍後，壓至1mm薄成餃皮。大閘蟹起膏，拆出少量蟹肉，以紹酒、薑粒、生蒜茸炒香，煮8分鐘成蟹粉，待凍。將餃皮包入蝦、蘆笋以及蟹粉，揑成金魚形，蒸6分鐘即成。
貼士：當然啦，屋企自己整未必做到金魚形，亦可包到傳統餃子形狀，一樣咁好味。
海膽蟹皇帶子餃
價錢：$38/3件
需時：20分鐘
材料：澄粉1両、生粉1両、鮮蝦3隻、帶子2片、海膽/蟹膏各11/2茶匙、鹽少許
做法：將1份澄粉混入1/3份生粉，倒入1份滾水拌勻，然後再加入餘下的2/3份生粉，搓成粉糰，待冷凍後，壓至1mm薄成餃皮，備用。帶子和蝦以少許鹽及生粉略醃。將蝦打成蝦膠，包上餃皮，放上半片帶子，最後鋪上海膽和蟹膏各1/3茶匙，蒸6分鐘即可。
貼士：生粉分兩次混入澄粉，餃皮不會變韌。
金箔豆苗帶子餃
價錢：$38/4件
需時：30分鐘
材料：澄粉1両、薯粉1両、豆苗1両、帶子4片、鮮蝦4隻、蟹子/金箔適量、炸蒜茸/鹽少許
做法：豆苗汆水，瀝亁備用。帶子和蝦以鹽和生粉略醃，剁碎，混入炸蒜茸及豆苗攪勻備用。將1份澄粉加入1/3份薯粉，倒入1両凍水拌勻，再加3両滾水煮熟，然後再倒入餘下的2/3份薯粉，搓成粉糰，冷凍後壓成餃皮，包入餡料，蒸6分鐘，最後放上金箔和蟹子點綴。
貼士：用薯粉代替生粉，做出來的餃皮會較煙韌；而搓粉時先落凍水後加滾水，可令餃皮更軟熟。
雲南野菌餃
價錢：$34/4件
需時：30分鐘
材料：雞髀菇/靈芝菇/鮑魚菇各1両、澄粉1両、薯粉1両、小棠菜/紅椒切碎適量、鹽/蠔油/紹酒/生粉各少許。
做法：將所有菇切粒，灑鹽汆水，瀝亁後以鹽/蠔油/紹酒調味，加生粉埋芡；小棠菜汆水，加入紅椒略炒，兩者拌勻成餡料。將1份澄粉加入1/3份薯粉，倒入1両凍水拌勻，再加3両滾水煮熟，然後再倒入餘下的2/3份薯粉，搓成粉糰，冷凍後壓成餃皮。包入餡料，蒸5分鐘即成。
傳統蝦餃點「餃」出嚟？
蝦餃最早出現在廣州郊外靠近河湧市集的茶居，當地盛產魚蝦，茶居師傅於是靈機一觸，將鮮蝦配上豬肉、竹笋，製成肉餡。當時蝦餃的外皮選用粘米粉，雖然皮質較厚，但由於蝦味鮮美，好快就流傳到城內的茶居，成為廣州名點。其實蝦餃可謂流芳百世，絕不易被其他餃取代；而且現今的蝦餃大都經過改良，踢走肥豬肉，齋用鮮蝦做餡，爽口彈牙仲冇咁油膩㖭。
13褶至正宗
材料：中蝦2隻、澄粉/生粉各1両、鹽少許
做法：將1份澄粉混入1/3份生粉，倒入1份滾水拌勻，然後再加入餘下的2/3份生粉，搓成粉糰，待冷凍後，切適量粉糰，用刀背壓至1mm薄成餃皮。
蝦剁碎打至起膠，用鹽和生粉略醃，即可包上餃皮，摺合成13褶，蒸7分鐘便成。
知多啲
澄粉即是無筋麵粉，是一種不含麵筋的麵粉。以其黏度和透明度均較高，因此主要用作點心的粉皮。記住，好的蝦餃皮要有13褶，咁至謂之正宗。