西貢小巴站旁不起眼的商場，多年來都是識飲識食朋友搵食的地方，捐窿捐罅搵食係一種樂趣，我當然唔執輸有樣學樣，點知俾我搵到好味嘅豬?湯麵，鍾意食豬的朋友更加非到不可。
記者︰方綺君
攝影︰周旭文
Model︰Algie
藥材湯米 夠健康
龍記本來只供應藥材牛骨湯底，牛骨湯加了當歸會較燥，老闆李生話︰「好多客話唔食牛，所以幾年前開始煲埋豬骨湯底，其實用的藥材同煮清補涼差不多，所以具有下火清熱功效。」湯底用藥材煲夠健康，仲有一個好重要的主角，就是桂林米粉，它比雲南米線粗身，咬口亦較爽和滑，鍾意食米線嘅一定鍾意食桂林米粉。𠵱家天氣咁亁燥，湯底又下火，記得飲清至好走。
藥材豬骨湯底桂林米粉
十全滋補豬骨湯底的藥材有黨參、薏米、沙參、北芪、杞子、桂圓亁、淮山、蓮子、百合、紅棗，連豬骨煲12小時。（$16一個米粉一個餸，每加一餸加$4）
藥材牛骨湯底桂林米粉
牛骨湯底比豬骨多煲2小時。鍾意食牛要試埋牛粉腸和黑牛百葉，李生話牛粉腸好快賣晒，而黑牛百葉唔識整好容易韌㗎！（$16一個米粉一個餸，每加一餸加$4）
龍記桂林米粉（27924421）
地址︰西貢敬民街高勝樓15號地下
營業時間︰星期一至日11:00am-11:00pm 座位︰約30個
豚角拉麵 想食講緣份
卡菲東西（CafeEastWest），聽名字都知有中、西美食，以食日本料理為主，主打拉麵和烏冬，老闆Allen又識整懷石料理。佢開店都是為興趣，認真多才多藝，拿手的豚角每四至七天先做一次，次次都好大工程，所以賣晒就無，食唔食得到都好講緣份。至於西式美食，就要推介Crepe，Allen說：「見到Crepe等於見到巴黎鐵塔。」所以佢一個星期前找來家在法國西北部Brittany的好友Stephane，佢細細個食阿媽整的Crepe食到大，𠵱家新整的KingCrepe都係阿媽教佢，材料全部來自法國，食入口又香又甜，又低卡路里。
長崎豚角拉麵$45
日本人叫一件件切好的豬肉做豚角，用水煮熟去除表面油份後，再用精製醬油醃10小時，加埋一隻溏心溫泉蛋和南瓜海帶豬骨做湯底，食完好幸福。
KingCrepe$25-$30
售$25的會塗上Nutella醬、士多啤梨醬、糖和杏仁醬；而售$30的有新鮮香蕉、士多啤梨、蘋果，再加雪糕要畀多$10。
卡菲東西（27920200）
地址︰西貢敬民街高勝樓16號地下
營業時間︰
星期一、二、四、五11:00am-11:00pm
星期六、日12:00nn-10:00pm
星期三休息
座位︰約15個
去毛豬手 食得安心
已經在巷仔開業30年的松記，住西貢的人一定識，當年食環署仲有辦食肆衞生獎的時候，「松記」作為一間車仔麵店可以年年攞獎。車仔麵餸有20多款，由$2至$6不等，不設最低消費，麵底一律$8，食一餸一麵$10搞掂。呢度以豬手和牛腩最出名，好多人怕見豬腳趾罅的毛，松記將豬手烚熟後會每隻去毛，炸到卜卜脆之後，燜到7成熟再焗。
（前）牛肚$5/份（後）牛腩$30/碟
牛腩選用最靚的坑腩，牛肚就用至爽至好食的金錢肚，唔會用草肚。金錢肚的坑紋深，一個個似元寶狀，唔似得草肚無紋似竹笙。
豬手$20/碟
無晒毛的豬手當然食得放心，以店中炒過的秘製醬燜豬手，又香又入味，豬皮唔韌，入口半膠狀，就算怕肥都要食！
松記車仔麵（27929172）
地址︰西貢敬民街高勝樓18-21地下
營業時間︰星期一至五7:30am-7:30pm
星期六、日及公眾假期7:30am-8:00pm
座位︰約80個
鹹豬肉 脆卜卜好惹味
滿泰小食店開業16年，同樣無人不識，除了鎮店手撕雞外，自家醃製的泰國鹹豬肉都有不少捧場客，店主何生何太話：「鹹豬肉用泰國香料醃製過，用水煮過後，亁水炸，外皮脆，肉質仍多汁又軟，加埋個甜酸汁，一碟就咁食完。」而店中超過百款泰式美食，想食乜都有，環境又夠晒親民，值得推介。
牛𦟌鹹豬肉金邊粉$26
金邊粉的湯底是用新鮮雞骨煲成，無鮮雞賣的日子點算？何太話︰「咪用番豬骨囉！」雞湯唔會留隔夜再賣，鹹豬肉浸湯內和湯一齊食，食到香口的脆邊，非常滋味。
燒豬頸肉沙律$48
豬頸肉燒至香脆，再加入新鮮的泰國青芒果條和其他蔬菜，非常健康。
滿泰小食店（27912271）
地址︰西貢福民路高勝樓地下25號舖
營業時間︰星期一至日8:00am-10:00pm
座位︰約80個
