有靚聲兄弟之稱嘅張崇基同張崇德，事隔一年又開演唱會，仲密過劉華同阿王！早幾年兩兄弟齊齊染金毛轉Look，Man爆外形大獲好評，最聰明一着係不停翻唱別人經典金曲，力證自己都係唱得之人，演唱會、影碟銷量口碑樣樣得。喺工作上絕對係合拍兄弟，之不過一講到車就完全唔啱Key，細佬鍾意做「客貨車」司機，舒舒服服歎慢板，大佬反而係「嗜辣」之人，揸車要有賽車手感，一文一武可算各走極端！
文：吳心彥
攝影：林栢鈞
採訪當日，天色陰暗，下着微微細雨，但卻沒有影響和崇基、崇德談話的氣氛，反而愈影愈開心，愈講愈興奮，第一個笑聲就是由他們在香港贏取新秀歌唱比賽冠軍開始……
韓國法拉利兩份揸
「93年我哋從加拿大讀完書返香港，咪諗住試吓兩兄弟各自交表報名參加新秀比賽，最後決定以組合形式參賽，點知真係得咗，仲贏咗部韓國大宇Racer返嚟！」崇基得戚地表示，這架車是他們正式回香港發展後，第一架屬於他們的FamilyCar。
對於韓國大宇Racer呢款車，兩兄弟更為它起了花名「韓國法拉利」，齋聽個名好似好架勢，誰知實情並非如此，「呢架車完全唔得，記得有一次喺上環上一條長命斜，架車行到一半上唔到，捱捱吓先上到停車場，到第二日開車，架車完全唔行得；拖車師傅一睇就發現波箱同成個制動系統燒晒，最後仲『滔埋』（TotalLost），諗番都幾危險吓！」崇基猶有餘悸地說。
崇德揸車最緊要安全
崇基、崇德兩兄在台前雖然合作無間，但一講到車，兩個人可謂各走極端！呢頭睇完雙門揭背手波辣車，崇德所駕的Estima好明顯同大佬好唔同，7人、自動波，好明顯為方便、舒適為前提；據知由夠秤的18歲考到車牌起計，到今時今日仍然係「香港人人愛」嗰隻零意外：「我唔係要慢駛，係要揸得穩陣，基本上我揸車至今都係零意外，買車從來都唔需要買啲講速度嘅車！」雖然不熱愛車，但是講到買車經驗，崇德就比大佬崇基多，「唔計加拿大嗰架雙門車Estco，喺香港我就已經買過4款唔同嘅車，包括有Mazda323、Picnic，同埋𠵱家呢架！」
買支咪要六位數字
對於即將舉行的演唱會，見記者多番追問，崇基、崇德終允透露一丁點，「我哋今次會移師陣地至新伊館開Show，因為嗰度先可做到最靚聲環境，更從德國訂咗兩支價值六位數字嘅私家咪！表演方面，會同Dancer特別炮製一Part音樂劇，仲會唱出跨年代嘅經典金曲，當然唔少得我哋最拿手嘅Unplugged歌啦！」
文曲星
喜歎慢板
未買入Estima7人車時，細佬崇德都係揸架Picnic7人車，不過由於外形似方包唔夠型，所以最終還是換了架Toyota最新7人車Estima，「呢架車既外形夠Smart，而且又夠Sporty，整體嚟講好吸引。最愛係後座勁舒服嘅飛機椅設計，有時開工等埋位，真係可以好舒服咁瞓吓唞吓！Estima嘅全平地台設計，真係可以畀到人好舒服感覺；買7人車都係為載人啫，何況仲係自己親人，當然要令佢哋舒服先得啦！」
屏幕監視車後盲點
呢款水貨版Estima仲有一樣優勝，就係跟車有個倒後鏡頭：「當一轉後波泊車，中控台的屏幕就會轉接往車尾的Camera，睇住嚟泊位安全又方便；據知行版同水版有一分別，就係行車轉倒後Camera時會暫停收音機等播放功能，但水貨版就可以邊倒車邊聽音樂！」
客貨車司機
崇德除安全為上，原來仲係一個客貨車司機，「喺香港經常要接載親人，就以大佬為例，每朝佢都會由揸車嚟搵我，然後放低架GolfGTI，再坐我架7人車一齊返工，加上自己間公司有時要搬貨，呢部Estima真係幫我慳番唔少Call車費！」
樣有跑格兼齊料
細佬崇德擁有的ToyotaEstima，是2.4公升的水貨版本，設備配搭也很齊全，甚麼倒車攝錄鏡頭，又或是DVD影音系統也有；若你是個講求外觀有型的人，也有加裝了包圍的AERAS版本！
ToyotaEstimaAERAS2.4規格
引擎：2,362c.c.直4DOHC
馬力：170ps/6,000rpm
扭力：22.8kgm/4,000rpm
傳動：SuperCVT-i無段變速自動波
車價：約30萬元起
武曲星
意外特多
在加拿大生活，車絕對是生活必需品，對比崇德，大佬遇到的交通意外似乎特別多，「我的確比較多遇到交通意外，可幸都係一啲輕微碰撞，最記得第一次意外喺加拿大發生，當時一條大直路行緊80km/h，點知有車小路出大路，原本佢同我架車距離成20幾架車位，但佢行得實在太慢，當我發現佢時，立即煞掣都收唔切，我架車嘅鬼面罩就咁就攝咗入佢車底！」
揸車講速度
「我好Enjoy揸車，除代步外，覺得車要有速度感先正，而揸棍波車就有嗰種好強控制架車感覺，就好似賽車手咁！」對於目前愛駒GolfGTI，崇基讚口不絕，「呢架車好快，200匹兼有Turbo，歐洲車鋼水好、馬力夠，Handling又好，唔會因為車仔細細而輕飄飄，好滿意，暫時都唔會換車住。」
現場試驗車速
崇基透露每次從跑馬地到大潭玩Wakeboard，每個彎位也可發揮到GTI的性能，「我絕對唔會飛車，不過每次經過彎位，都感覺到架車好敏捷、好有速度！」採訪當天，崇基貪玩地，應記者要求感受到他開行馬力的感覺，記者整個人都貼實椅背，果真有料到！
城中Hothatch
哥哥崇基擁有的GolfGTILightweight，是刪減了不少豪華設備的輕量版，它比原裝GolfGTI輕了100kg，從而令那台2.0公升Turbo引擎表現變得更強。
VolkswagenGolfGTILightweight規格
引擎：1,984c.c.直4DOHC配Turbo
馬力：200bhp/5,100rpm
扭力：280Nm/1,800rpm
傳動：6前速手波
車價：$248,000
唱足13年有起有跌
