近排市場焦點去晒新股度，散戶開口埋口講邊隻新股最好炒。雖然新股認購已經截晒飛，但網上討論區仍然係新股天下，唔少人嫌「派彩」太少，喺新股掛牌後再追貨，呢啲咁高難度嘅動作，只適合一啲久經訓練嘅老手去玩，自問手腳慢就千祈唔好仿效，萬一走唔切就一手都係。
市場資金走晒去新股，一啲曾經集萬千寵愛嘅股份被打入冷宮，有時間不妨慢慢掘，話唔定執到寶。上網見有人提到中移動（941），隻股失寵咁耐，可以睇吓，上星期五收報62蚊，逆市跌10仙。
煲水新聞出埋就反彈
係《香港討論區》入面，6_qol提醒大家：「中移動見底，如果連和黃（013）賣3G畀中移動咁搞笑嘅消息都傳得出，中移動應該真係見底啦……每次當有呢啲搞笑消息傳出，跟住好快就會彈上去。」
雖然係煲水新聞，但aa0228都有啲擔心：「如果佢真係接咗13個3，咁就慘啦，有排跌。」
6_qol就冇有怕：「941自己嘅3G都未搞掂，又點會接人哋嘅3G呢。」
中移動今年6月中由39蚊附近起步，連升5個幾月都冇乜回過氣，上月頭最高去到69.70元至回吐。
隻股忽然由升市火車頭變成跑輸大市，其中一個原因係之前累積升幅太大，積聚咗大批獲利貨，當70蚊阻力連試3次都唔穿，揸咗貨嘅選擇走為上着實在唔出奇。
撞啱內地3G發牌日子漸漸逼近，市場擔心中移動日後開支大增，影響未來幾年盈利，令股價持續受壓。事實上，3G業務會唔會成為中移動嘅負累，暫時言之尚早，市場要㩒住股價，梗有一大堆假設。
照圖睇，中移動上月28號跌穿三角形整固形態，量度跌幅約60蚊。隻股反覆跌咗兩星期，已完成調整，但係短期唔好期望有好爆炸力嘅反彈，第一個反彈目標先睇65蚊，儲夠力後再挑戰70蚊。
余文