近排大家淨係顧住新股上市賺幾多，講得多都有啲悶，《香港討論區》網友zyzzve就搞搞新意思，問吓上市公司有乜靚女主席/董事/高層？有靚女大家就梗係醒神，佢拋磚引玉問：「除咗修身堂嗰個仲有冇？」修身堂嗰個咪就係主席張玉珊囉。
mrturtle回應：「78」，即係富豪酒店（078），相信mrturtle所講嘅係富豪主席羅旭瑞嘅掌上明珠、富豪執行董事羅寶文。雖然羅寶文都係靚女一名，但佢唔係做主席，所以佢唔算數。
瀝古瀝古就推介康健國際（8138）主席蔡加怡，即係玩具大王蔡志明個女。蔡加怡原本只係公司嘅執行董事，係10月26日先至被推選任主席，可以話新鮮出爐。
以上舉出嘅都係年輕靚女，但有網友唔睇外貌，而係着重內涵，luenfat53話：「冇人講九龍葉嘅……玖龍紙業（2689）主席廢紙變銀紙。」
今年10月公布的《觀潤湖2006胡潤百富榜》，玖龍紙業創辦人兼董事長張茵位居榜首，成為首位登上中國首富寶座的女性。在上月公布的《福布斯》2006中國富豪榜則名列第五。