前晚徐小鳳在紅館開騷，首場演出顯得有點緊張，經常蝦碌甩嘴，不過她很快便接上，更三度獻唱hiphop新歌《徐想曲》。小鳳姐全晚共換上四套歌衫，紅白藍黑的設計依然貫徹其風格，凸顯纖腰。
徐小鳳前晚在紅館為其十場「金光燦爛徐小鳳演唱會」揭幕，雖然不時甩嘴，但小鳳姐處變不驚，很快便接上繼續唱，不過全晚唱了三次新歌《徐想曲》，十分hardsell。
有鑑於上次演唱會的服裝惡評如潮，徐小鳳今次演唱找來本地時裝設計師鄧達智（William）設計新裝補鑊，做了紅色羽毛裝和藍色魚尾裝，設計貫徹其一向金光燦爛及強調纖腰的風格。小鳳姐全晚穿上四套晚裝，另外有兩套因為太大，未能送進後台，她表示稍後會考慮修改再穿上。
「𠵱家唔飛車」
演唱會邀請了張崇基和張崇德任表演嘉賓，兩兄弟向徐小鳳大吐苦水，指早年被傳媒批評半紅不黑，近年甚至沒有見報機會，相反小鳳姐開騷前卻新聞多多，她聞言說：「我麻麻哋鍾意呢啲新聞，俾狗仔隊追車好危險，我𠵱家唔飛車，大家鬥慢。」
小鳳姐前晚可謂有求必應，除跟觀眾握手打招呼，還讓歌迷點唱，其後更邀請男性朋友上台合唱粵曲《香夭》，可是演唱期間觀眾席卻傳來嬰兒哭聲，大殺風景。演唱會結束後，小鳳姐接受訪問時表示點唱部份是即興，所以要拿着貓紙，對於歌迷高呼她唱得好過周杰倫，她說：「冇聽到，乜我可以同佢比較？佢跳舞勁啲，我一跳就忍唔住笑。」
人手釘羽毛
此外，設計師William昨日則在電話中說：「小鳳姐好清晰知道自己嘅要求，佢開場着嗰條紅裙好考功夫，人手釘上羽毛，需要三個工人、花咗十日時間，總共用咗200碼布。小鳳姐又對藍色情有獨鍾，所以第二套衫係魚尾裝，上面嘅牡丹花係佢私人珍藏，呢條裙都用咗100碼布。兩條裙我只係收咗小鳳姐布錢，其他我嘅手工就送畀佢做禮物。」
採訪：王連連
攝影：陳俊強
