有理由相信，「好好彩」做咗李太嘅徐子淇，已經直接同間接咁破壞咗社會嘅和諧氣氛。首先，好多本來蜜運中嘅癡男怨女，睇完呢單新聞之後，都開始抱怨自己點解咁唔好彩；其次，由於唔係所有恒基集團嘅手足都有一萬蚊大利是，難免有人心生嫉妒，覺得世界唔公平；其三，好多馬迷噚日都為咗徐子淇而作出咗錯誤嘅投注，總共輸咗成千萬銀，傷盡fans嘅心。
噚日八方喺茶餐廳食早餐，周圍嘅茶客都講緊徐子淇下嫁恒基太子李家誠單嘢，啲人似乎關心個豪門婚禮多過壽終正寢嘅舊天星鐘樓。以下係其中一對男女嘅對話，女方話：「如果我識到李家誠就好囉，有幾億禮金。」男方答：「如果我係李家誠就好囉，可以娶到徐子淇。」女方即刻變咗黑臉琵鷺，非常嬲怒。
咁究竟街坊街里最想做李家誠定係徐子淇呢？原來兩個都唔係，而係恒地嘅員工，皆因大老闆四叔李兆基已經宣布派利是，一人一萬。年尾流流，失驚無神有人塞成皮嘢落你個袋度，真係恨死普天下嘅打工仔。
愛駒「幸運鑽石」跑尾二
恒地員工大約有一千人，四叔大拿拿私人醒成千萬出來，同下屬分享迎娶新抱嘅快樂，不過就唔係所有恒基集團嘅人都感受到佢老人家嘅愉快心情；煤氣、美麗華同香港小輪嘅員工都冇份，就連恒地租務部嘅職員，噚日都向八方投訴，話佢哋並無收到利是。
都話咗幸福唔係必然㗎喇！好似四叔隻愛駒「幸運鑽石」咁，噚日喺沙田出賽，普羅馬迷見到報紙頭條嘅徐子淇，成身幸運鑽石咁應景，諗住四叔今次一定會去馬，以賀新婚，個個都追捧「幸運鑽石」，成為2.1倍大熱門，獨贏位置連贏成千萬銀買喺佢身上。
點知「幸運鑽石」跑尾二過終點，馬迷嘅賭注全部化為四叔嘅人情賀禮，隻馬賽後仲被獸醫驗出氣管有好多血。「幸運鑽石」係由李兆基、鄭裕彤同明嘉福合夥買入嘅，賽後明嘉福話，隻馬跑得咁肉酸，累馬迷輸錢有啲唔開心。
至於明嘉福自己有份嘅團體馬「海中寶」就跑第二，佢仲買中「世紀巨星」搭「海中寶」呢條三百幾倍嘅大冷Q，未至於空手離場。