儘管「日理萬機」的李嘉誠和霍建寧一直力撐旗下各地3G業務「掂」兼夾「唔急要賣」，但外間一直認為、甚至「睇死」佢哋「必賣無疑」，亦藉住呢個「利好消息」將和黃（013）呢隻藍燈籠的股價炒上去！好似噚日係咁而傳話3UK會賣畀中移動（941）或者中電信（728），和黃即刻有反應，咁如果和黃真係要賣3G，究竟係好定係唔好呢？
大部份人認為，假如和黃將3G呢個止唔到血的腫瘤切除，前景一定美好，「股價更加可以即時彈上90蚊或樓上」，大家都覺得Bloomberg啲料「唔會流得去邊」，佢哋又認為，超人要賣3G仲有兩個理由：一「係幫和黃收拾殘局……玩退休」；二係預備筆錢「隨時用嚟貼楷仔」。
「真係咁正使乜要賣」
至於傳咗咁耐點解仲未賣得成，網友認為，係超人仲未同人哋傾好價錢，因為佢自己認為3G個價唔止咁平……之但係亦有好多人認為，啲風係和黃自己吹出嚟，搞到自己檔3G有價有市，而假如3G真係咁正，又使乜要賣？又點會賣極賣唔出呢？