新股興達（1899）將喺嚟緊星期四上市，獨家炒影子股得首長寶佳（103），寶佳要買。寶佳同興達一樣，主打業務子午線輪胎鋼簾線，後邊隻興達，06年度（12月止）預期PE講緊10.9倍至15.3倍，招股後P/B1.9倍。影子股寶佳，預期07年度（12月止）PE7倍，現價P/B，亦不過0.9倍，好抵買。
再講，呢期新股炒到癲，唔少新股一上市，較招股價翻半番，視作等閒。若然情況持續，興達一上市，預期PE分分鐘又唔係8倍、10倍嘅水位，寶佳吸引力自自然彈出嚟。又興達有富豪級嘅金手指四叔做生招牌，寶佳亦唔弱，呢期引進全球龍頭同業Bekaert做策略性股東，Bekaert協議入股寶佳，配股價每股0.65元，又同寶佳現價（0.67元）差無幾。博寶佳現價翻半番，到時，07年度PE都係10倍鬆少少。
大褔買定等破位
大褔（665）喺1.57元半年阻力軌前橫行，買定等破位。大褔06年度中期（6月止）純利升1.7倍去到8230萬銀，已經超出05年度純利6295萬銀。港股下半年靚爆鏡，照計，大褔下半年純利，起碼可以睇齊上半年水位，全年度純利1.6億銀，PE不過5倍。
再講，呢期中資金融股炒到飛起，大褔又計劃發展祖國業務，有concept。博試番1年高位兩蚊，潛在回報率30%，預期PE不過7字頭，抵博。
錢雋