科技投資專家自有矽谷之稱嘅聖荷西（SanJose）來港一行，搵左丁山做導遊，呢位美國人在矽谷慣咗揸車，二十度氣溫之下帶佢喺中環行兩步就身水身汗，一坐低就連飲四杯凍檸樂，佢見到左丁山要飲熱茶，大惑不解，猛問左丁山點解唔飲冰水，鬼佬身體構造與我哋唐人唔同，冇得解釋。據呢位專家Ｌ講，佢上網查祖宗十八代族譜，發現可追溯到八世紀查理曼大帝，母系來自愛爾蘭，父系來自瑞典，皆寒帶地區，阿爺嗰代移民美國，叔公一系好多家人搬到加州後都患上皮膚癌而死，現在佢地知道基因遺傳嘅道理，故此每年都驗皮膚，或者因為如此，專家Ｌ好怕熱，喺麗嘉酒店食完飯，行去置地廣場，佢竟然話要搭的士。想俾司機用粗口鬧咩，左丁山堅持要行路，彰顯港美文化之不同。
專家Ｌ在矽谷出世，長大，大學在柏克萊讀工程，入電腦公司做分析師，十幾年前睇林治（PeterLynch）嘅名著OneUponWallStreet，睇到林治話，所有投資專家都係穿上皇帝新衣，實際全無特別之處，投資者可從日常生活之中，知道邊類公司，邊啲生意掂唔掂，專家Ｌ恍然大悟，知道自己最識資訊科技，在矽谷成長，不如專注於投資矽谷資訊科技公司。於是辭職創業，嚇咗阿媽一驚。
專家Ｌ搵到一啲志同道合人士，成立科技投資公司，頭五年成績極佳，每年獲利增長50%，於是聲名大噪，CNBC經常搵佢評論科技股。呢，佢喺星期一（十二月十一日）就俾香港CNBC捉咗上去中環廣場直播室講TechReport。左丁山陪佢上埋去，問佢講幾耐，專家Ｌ話：「CNBC好現實：節目監製覺得你講得唔好，一分鐘就cut。兩至三分鐘係正常，講夠五分鐘就非常非常畀面！」左丁山睇住時間，專家Ｌ在CNBC畫面出現時間由十一時四十三分至十一時五十一分，足足八分鐘，唔通CNBC冇其他話題，搵專家Ｌ填塞時間？專家Ｌ出咗直播室唔夠一分鐘，招待員立即送上訪問嘅DVD錄影碟，認真交帶，令人覺得CNBC幾專業。