早兩日先至講過隻屢創新高嘅工業股宜進利（304），噚日再升7%，公司公布上半年度營業額12.9億元，純利1.2億元，增長48%，期內來自中國地區嘅營業額倍升，佔咗總收入44%，取代北美成為營業額及盈利貢獻最大地區。
由於公司主要生產基地位於內地，換句話講，公司差不多變成內銷股，難怪會被摩根大通列為來年10大必買「國企」股之一。
另一隻提及創新高嘅永恩國際（210），再升多兩日又創新高，至於幾隻創新低嘅工業股則命運迥異，精電（710）有10厘息打底，連續兩日升分別10%及4%，敢博反底相當和味。
噚日掛牌嘅新股表現好波動，最難抽嘅錦江（2006）表現最勁，開市價較招股價高出近倍，不過都由高位跌咗兩成，兩隻影子股香格里拉（069）及大酒店（045）分別升2.2%及1.2%。中交（1800）開市較招股價高出近七成，但係就由高位大跌18%，表現差過預期，高追者輸得慘烈。
反而真明麗（1868）首日買貨賺錢，應該多過輸錢嘅散戶，因為股價高開9.55元後，15分鐘內已經急跌落全日低位8.04元，之後基本上都係反覆造好。
真明麗造燈飾，過去3年複合營業額增長22%，而且國內市場仲有好大增長空間，講潛質唔會差過其他兩隻新股。
歐陽風