科技投資專家Ｌ成立科技基金，頭五年成績卓著，全美國第一，於是散戶踴躍買入，點知到咗二○○○、二○○一年，科技股散晒，專家Ｌ嘅基金因為不是對沖基金，只揸長不沽空，損失慘重，唯有緊縮皮費，死捱，卒之到咗二○○二年尾，科技股復甦，至今自低位上升100%，專家Ｌ唔死得，於是掂番晒。故事教訓係，做事，投資，一定要有stayingpower（韌力），好景時唔好使錢太多，要留番啲子彈當作寒冬儲糧。
左丁山問佢：「矽谷人點解咁多創意？東岸例如波士頓一帶有哈佛，MIT等名校，點解唔可以成為科技中心？」專家Ｌ諗咗一諗，竟然話：「西岸，特別係加州人喜歡轉工，東部人比較願意長期在一間公司打工。轉工轉得多，轉得快，就能夠適應不同環境，接觸不同人物，腦震盪得T特別快，故此時時諗到新意念。東部人喺一間公司打工十年八年，返工變成公式化，日日見到同一環境事物與舊同事，邊會諗到咁多新嘢吖！」
唔怪得之一位老友講過一個故事，某華人專家博士喺矽谷某著名電腦公司工作十年，對薪水、環境十分滿意，但某年某月上司換咗人，作風令華人專家好難頂，諗住自己經驗豐富，學有專精，何不出外闖天下，於是辭職。點知好耐都搵唔到工，原來啲新公司認為：你如果真係咁叻，應該老早出來開公司或轉工啦，做十年先至走，梗係瘀血嚟嘅，故此冇人請佢。
專家Ｌ話好多矽谷新意念都係工程專家夜晚放工，喺一○一公路塞車之時諗出嚟嘅，一諗到就第二朝立即辭職，自立公司搵VC（創投基金），唔會益老闆，到做到有成績嘞，就以高價錢將間公司賣畀大公司，故此矽谷之併購活動無日無之。專家Ｌ專注分析科技新趨勢，以前淨係由聖荷西揸車去PaloAlto，沿途可以見晒啲公司，但現在就要飛去深圳、北京、Banglore，睇埋產品設計與製造，辛苦好多，佢話有一隻最新產品將電腦電視連接上網（可以喺香港上網睇番聖荷西電視台節目），間公司只有十幾人喺矽谷，但有五十人在印度，科技發展已經全球化，再無地域限制可言。