世界華人慈善夜前晚喺北京舉行，現場衣香鬢影，美國前總統喬治布殊夫婦、內地嘅紳商名媛都應邀出席。李亞鵬、趙薇同范冰冰等則代表演藝界參加呢個盛會。一眾名人紛紛捐出自己心愛嘅物品拍賣，為慈善基金一共籌得約2,000萬人民幣。
李亞鵬同王菲嘅愛女李嫣天生兔唇，因而觸發佢哋成立咗「嫣然天使基金會」，以幫助內地同樣患兔唇嘅兒童。呢個基金會喺今個月26日喺北京搞個晚宴，劉嘉玲一早答應支持。華人慈善總會同布殊夫婦分別率先捐款10萬人民幣同1萬美金（約78,000港元）畀呢個基金。李亞鵬接受善款時仲話：「今次我是由劇組那邊趕過來接收善款，10萬元對嫣然基金來說很重要，希望有更多的好心人加入捐助隊伍。」
留家照顧女兒
問到王菲為何缺席，李亞鵬好幽默咁話：「天氣太冷，夫人就在家看孩子。」有指王菲為嫣然基金晚宴特別錄咗一首歌，究竟係咪意味住王菲有意復出？李亞鵬話：「王菲只是給這個活動錄了一首歌而已，不能代表復出。」講到李嫣𠵱家嘅情況，李亞鵬話：「她恢復得很好，明年春天我還要帶她去做第二次手術，不論如何她都會留下一些『神的印記』，但在愛心人士面前，這都不重要。」