經濟好轉，個個老闆都話有人工加，散戶抽新股又逢抽中必贏錢，但唔知點解樓市硬係冇乜起色？
網友100mollionhkd喺《香港討論區》提出「股市愈瘋狂＝樓市就會愈低迷」，佢提出嘅理由係︰「樓市價格升跌只係多得一班炒家投資者做好多短線成交推動，用家不大可能影響到個價，當股市咁勁咁好搵，樓市炒家白白睇住幾千萬投資喺度發霉等運到，利息都蝕埋，用吓腦都知要走人啦，樓市炒家就會走過嚟搵食，唔好計個別股份今年升100%以上，指數也升咗30%，租樓嘅成本只係5%，股市歷史回報有15%。中國正在起步，未來股市回報可能更好，長線用吓腦都知樓宜租不宜買。」
ducklhl大表贊成，佢話，今年有玩IPO嘅，個個至少升兩成，中交（1800）第一天升70%。11大頭仔11亦話：「買股好過買樓！」
點都係買唔過
不過，foodcourt就話：「股市低迷=樓市就會愈愈……愈低迷」，咁又係，股市賺唔到錢，又邊有錢買樓，所以iq21話：「股市愈瘋狂=樓市就會愈低迷股市愈下跌=樓市就會愈低迷股市愈淡靜=樓市就會愈低迷通脹=樓市就會愈低迷通縮=樓市就會愈低迷人民幣升值=樓市就會愈低迷人民幣貶值=樓市就會愈低迷經濟增長=樓市就會愈低迷經濟衰退=樓市就會愈低迷。」結論係──樓市低迷。