華華幾時都講，執輸行頭慘過敗家，早着先機就隨時發過豬頭，好似東亞銀行前幾年不斷拓展內地業務，今年終於步入收成期，兼夾食正中資金融狂熱，股價由年初23.55元，一路飆到最新收報41.65元，升咗77%，贏足大笨象滙控幾條街。
盤數咁靚，好事亦自然來，噚日南華早報（SCMP）同DHL速遞合辦嘅「香港商業獎」，就頒咗最高殊榮嘅「商業成就獎」畀東亞，主席李國寶亦畀面出席，仲話由自己賺嘅第一桶金開始，已經明白成功之道，最緊要就係令客人滿意。
籌款額冠絕全校
話說寶哥哥50年代留學英倫嘅劍橋大學，佢話校方有個優良傳統，規定同學喺畢業嗰年嘅聖誕，都要落力為慈善團體籌款，學識回饋社會。不過，當年英國全世界都窮到燶，搵人捐錢一啲都唔容易。寶哥哥亦絞盡腦汁，諗起自己係全校唯一華人，而數勻全國亦唔多得去邊，於是着住唐裝衫，喺學校搭營幫人算命占卜，每次盛惠5先令。
佢話，經濟唔好，問卜者多數都苦瓜咁嘅面口，所以佢每次只講啲好聽嘅說話，激勵人心。可能寶哥哥把口啷過油，佢嘅檔口迫到爆，埋單籌得25英鎊（喺50年代好多錢㗎），冠絕全校，多過第二名嘅金額5倍喎。
講番個頒獎禮，今年已經係第17屆，評選會由港府經濟紅人、港大首席副校長王于漸揸弗，是次幸運兒除咗寶哥哥之外，大會亦頒咗「傑出管理獎」畀地鐵周松崗，啱啱分拆咗積層板嘅建滔化工主席張國榮就攞咗「東主營運獎」，至於「海外拓展獎」同埋「傑出企業獎」，就分別由物流企業保昌控股，以及胸圍生產商維珍妮奪得。
[email protected]