A貨豬扒唔肥　和尚都舔舔脷

唔好以為食齋就唔可以食「肉」，新開張的大自然素食就有多款「肉類」任君選擇，有吉列豬扒、咕嚕肉、魚生刺身任你揀，聽到已經流口水！全部用大豆纖維製造，可以做到肉類一絲絲的質感與口感，咁食齋都可以大魚大肉啦！

記者：林思樂　攝影：伍慶泉

「禾之家」信心保證

一踏入新舖，就見到座無虛席，呢種情況真係好少見，原來新店與禾之家素食是姊妹店，怪不得有咁多食客一早知碇。問老闆咁點解新店唔叫番「禾之家」呢？佢話：「禾之家有2間分店，好多客人訂位時都會撈亂，明明訂太子店，但係去錯油麻地店，所以索性改名方便客人。」此外，裝修風格與禾之家好唔同，感覺年輕時尚好多，老闆話：「我想個環境輕鬆啲，等客人唔會有食齋的拘束感，而係覺得食緊創意健康食物。」

大豆纖維口感似肉

想新店更有口碑，創新菜式自然不可缺少，佢哋嘅仿肉類更做得特別出色，不論賣相和味道都同真嘅一樣，咁究竟有咩秘訣呢？「一般素食店做『肉類』會用菌類或魔芋，但始終冇肉的質感。於是我哋就用成本較高的大豆纖維，具有肉類一絲絲的質感，而且營養價值高，有豐富蛋白質。」而大豆纖維仲可以降低血糖、血清膽固醇、血脂質，對腸胃亦好有益處。店內的大豆纖維從台灣入貨，師傅自己加工，將大豆纖維浸水、切絲、磨碎、加入麵粉，再做成肉塊的形狀。至於最關鍵的一步，就係點樣調出肉的味道？老闆就話係商業秘密，不過就保證用素食材料調味，葱、蒜頭都唔會用。

金絲裹劍魚$58
相似度80%

外面的金絲是用生麵炸成金黃色，除了賣相吸引，咬落脆卜卜好惹味。裏面包住的劍魚真的有魚的鮮味，師傅話因為加了紫菜，所以有鮮味。

三文魚、鮑魚刺身雙拼$68
相似度40%

鮑魚刺身無論質感同味道都不是太相似，但鮮甜爽口，「肉汁」豐富。三文魚刺身滑到用筷子夾時有啲困難，食落冇三文魚咁煙韌，但味道唔錯。

香荽番茄豬扒湯烏冬$36
相似度95%

呢度嘅吉列豬扒最受歡迎，煙韌口感，做到完全不油膩嘅秘訣，是先用慢火慢慢炸至金黃色，然後再用大火收油，所以做到表面香脆又唔油。