侯城今季嘅演出，同球會會徽入面隻兇猛老虎差好遠，排到英冠尾２真羞家，禮拜六主場對前列隊卡廸夫城照例稍被睇淡。之但係，侯城炒完領隊表現有進步，客軍進襲隨時逼虎跳牆，或被反咬一啖，「讓球」平手可撐。藍鑽石
上星期推介「黑貓」新特蘭，幸不辱命，食髓知味再攻英冠。睇晒今輪賽序，總覺得侯城對卡廸夫城平手盤，主隊諗得過。侯城班主皮雅臣賽前講到不成功便成仁，大大聲叫球迷入場打氣，仲不惜將門票價錢一律減到5鎊（約75港元），擺明想靠大聲嚇人。
炒領隊後防線進步
呢隊波早排炒咗領隊羅賓遜，搵教過保頓同埋打比郡嘅菲爾布朗做暫代領隊，上場作客中游球隊普利茅夫都係僅僅輸1球，據講防守表現明顯有進步。香港球迷對呢隊波唔慌熟悉，其實仲有中場班比，呢，即係踢過熱刺、米杜士堡、愛華頓同埋利物浦嗰個前英格蘭國腳撐場。菲爾布朗上場將佢推前，同另外兩個攻擊球員組成三叉戟，近期亦頻操呢個進攻模式，希望到禮拜六交到貨啦。
卡城跌watt前線死火
卡廸夫城話就話排緊第3，其實係表面風光，近5場波未贏過；上場主場對中下游嘅葉士域治，兩度領先都終被扳平2:2，似乎跌咗watt。威爾斯國腳中場派利長唞，而史堤芬湯臣、祖柏最近亦冇斬獲，吓吓要靠後衞佩斯數糊，唔化算。侯城擺明唔係大藍籌，唔值得長揸，筆者忽然起勢睇英冠軍情只係博呢鋪，希望今次平手盤有斬獲，補埋佢哋贏波開W。
講完雙「城」戰講雙「普」戰，普雷斯頓作客連輸兩場，禮拜六主場鬥普利茅夫有權贏番場。我信兩個要點，首先係普利茅夫近3場作客得兩分咁大把；其次係佢哋後防主將兼隊長禾頓上場對侯城勇戰傷膝，要長唞。
投資特攻隊金句
侯城擺明唔係大藍籌，唔值得長揸，筆者起勢睇軍情只係博呢鋪，希望今次平手盤有斬獲，補埋佢哋贏波開W。