有份選特首嘅800個選委名單塵埃落定，煲呔終於得閒處理機管局阿頭人選，呼聲最高嘅港龍前行政總裁許漢忠，果真接替彭定中，明年2月1日出任機管局行政總裁，實行由機場用家，變成機場話事人。
今年買起港龍，亦令許漢忠辭埋份工嘅國泰，反應極快，喺機管局宣布新老闆後幾個鐘就出聲明，國泰行政總裁陳南祿話歡迎許漢忠成為新任機管局CEO，期待與許生衷誠合作云云。
市場一直盛傳，許漢忠與陳南祿呢兩位國泰同門師兄弟唔係咁啱key，華華希望兩人以後真可以衷誠合作。
許漢忠97年離開國泰系統，擔任港龍行政總裁近10年，熟晒中港航空市場，咁啱機管局近年積極與內地建立空中橋樑，兩者一拍即合。許漢忠𠵱家喺港龍前阿媽中航集團做董事，都係過冷河方便搵新工啫。