好多人都鍾意拎新加坡同香港比較，因為兩個地方都得豆腐膶咁大，又冇天然資源，只係靠金融業就賺到盤滿缽滿。兩個地方咁近，香港梗係擔心俾新加坡爬頭喇，不過好多人會話，有一樣嘢新加坡拍馬都未追得上香港嘅，就係樓價嘞！咁你就錯晒喇，因為啱啱有個新加坡盤，其中一個單位創咗呎價新高，賣到13675蚊港紙一呎，比舊紀錄高咗35%，拍得住香港嘅半山豪宅。
呢個單位面積1625方呎，3房，成交價440萬新加坡元（下同），平均每呎2708元，比起樓盤今個月中嘅開賣呎價約1700蚊，足足高近六成。
邊個咁巴閉？咪就係李超人嘅長實，聯同香港置地同吉寶置業合作發展嘅濱海灣住宅MarinaBayResidences囉！賣到咁貴都唔算巴閉，最勁係個單位唔係成個盤最靚仔嘅penthouse，換句話說即係樓價「高處未算高」。