曾幾何時，中國企業都以到紐約上市為榮，但自美國喺02年頒布《薩班斯─奧克斯法案》打擊企業違規行為後，不少中國公司都懼怕該法案，不敢到美國上市。有人批評，美國為確保數年前的Enron會計醜聞不會重演，推出過於嚴苛的企業管治法，實有矯枉過正之嫌。
不過，有人認為美國對付經濟犯罪的刑罰過輕。喺《MSNBC討論區》網民Whyte話，Enron、世界通訊（WorldCom）等企業幾年前犯咗嚴重嘅欺詐罪，涉及金額高達數以10億美元計，搞到美國好多無辜市民雞毛鴨血，仲打擊埋當地經濟。佢問呢啲企業醜聞嘅涉案罪犯，應唔應該被判處死刑，或者被判終身監禁？
監倉度餘生抵償
JIMHOLLAND認為，除非有證據顯示從事經濟犯罪嘅人導致他人死亡，否則唔應該被判處死刑。不過，由於呢啲罪犯令好多人吃盡苦頭，佢哋應該喺監倉度過餘生，而且唔准假釋出獄，咁樣先可以抵償滔天罪行。
radicalmoderate講，Enron前行政總裁斯基林被判監24年，刑罰太輕，佢全家人都應同時被剝奪財產，等佢哋一世捱窮，要靠社會保障過活，咁樣先可以起到阻嚇作用，避免其他公司再次欺詐投資者。JohnnyRotten打趣咁話，法官一定係有閱讀障礙，將42年嘅刑期錯讀成24年。