悉尼直擊
今日在悉尼舉行婚禮的李家誠和徐子淇，昨晚在當地舉行歡迎晚宴，安排雙方家長及親友出席，李兆基（四叔）三代同堂齊齊盛裝赴會，心情大好的四叔更直言想抱男孫。
昨晚李家誠與徐子淇的婚前歡迎晚宴於悉尼CircularQuayWest的OverseasPassengerTerminal舉行，一對準新人抵達餐廳後，眾親友分別於澳洲時間晚上8時許乘坐七人Van及旅遊巴到達。
男方舉家出動
出席歡迎晚宴者多達150人，除一對新人及雙方家長外，準新翁李兆基更闔家出動，包括他三哥李兆麟、胞妹馮李媛瓊、大女李佩雯及其夫婿李寧和子女、二女李佩玲及夫婿鄭啓文、三子李家傑等，陣容相當鼎盛。
結上紅色領呔的新翁李兆基抵達現場時心情極靚，他一見記者即說：「你哋嚟有得分咩？返公司𢭃多啲人工啦，做乜咁辛苦坐8個鐘飛機嚟？」問他娶新抱是否很高興？他說：「冇乜特別，個個都會成家立室㗎啦。」他日前恨抱孫恨到出聲，昨日他說：「個個都恨啦，我都希望，其實男女冇所謂，不過計起都係想要個男嘅。」
「冇竹門對木門」
問四叔有沒有送家傳之寶給新抱？子淇所戴的粉紅藍寶石頸鏈是否由他所贈？四叔開玩笑說：「唔好亂戴呢啲嘢嚟，入境好麻煩㗎。」提到不時有報道指李、徐兩家是竹門對木門，四叔說：「呢個年代仲邊有竹門對木門㗎？」記者開玩笑問人稱四叔的他是否也送出四億元禮金，他聞言說：「隨便你哋諗啦。」是否默認？他風趣說：「或者係啦。」
至於徐子淇外婆、胞妹、擔任伴娘的好友、化妝師GaryChung、髮型師CalvinChan，以及伴郎李民彬，昨晚也有出席晚宴。
採訪：何永寧、梁錦雯
攝影：葉君海
