森美早前與王菀之（Ivana）合作演出舞台劇《BigNose》後，十分欣賞對方，所以他近日再次邀請Ivana參演廣播劇《森之愛情》，二人更會扮演情侶，演繹多個圍繞聖誕節發生的愛情故事。
森美日前為了答謝王菀之演出由他任編劇的廣播劇，專誠買了一個小型摩天輪送給Ivana作聖誕禮物，Ivana也禮尚往來，以一個流星形的聖誕薑餅作回禮。森美坦言覺得Ivana的聲音如天使一般，故此他在構思《森之愛情》這個有關聖誕節的廣播劇時，第一時間便想到找她當女主角。
大讚靚聲
森美說：「我本身真係好鍾意Ivana把聲，真係好有吸引力，佢畀人一種小朋友嘅感覺，好純真，所以搵佢錄一個愛情故事應該好聽到不得了。」過去很多藝人會在合作時日久生情，問到森美多年來有沒有試過愛上對手時，他堅決地說：「真係一次都冇，頂多都係抽離唔到一陣，返到屋企就會冇事，況且今次同Ivana只係錄十集廣播劇，而且唔係每一個故事都係sweetsweet嗰隻，所以我一定唔會抽離唔到。」
Ivana則笑言要視乎森美所寫的劇本是否感人，她說：「我都冇試過愛上一齊合作嘅對手，只係上次做完《BigNose》好唔捨得所有人，而且上次套劇係講友情為主。」
原來Ivana眼中的森美是個100分情人，她說：「森美真係一個好好嘅大哥哥，佢份人好善良，又叻又有創意，又畀到人安全感，但係佢成日都會取笑我㗎，喺嗰個時候佢降到得番負分。」Ivana又表示希望將來有機會與深愛的人共度浪漫聖誕，她說：「我嘅浪漫聖誕好簡單，只要同相愛嘅人坐喺一個細細哋嘅地方，有啲聖誕燈飾，最重要有一杯熱朱古力兩份飲，之後攬住咁過就已經好浪漫。」
採訪：李珮洳
攝影：陳偉權
化妝：ChrisChanofZingMake-upSchool髮型：MichaelLamofHairCulture
