嘩！新Tech：排30分鐘玩《GTHD》<br>GT之父都揸唔掂

嘩！新Tech：排30分鐘玩《GTHD》
GT之父都揸唔掂

亞洲遊戲展開Show　110部PS3試玩
一年一度嘅亞洲遊戲展（AGS）開幕喇，撞正PS3誕生，SCEH自然有咁大搞咁大！為滿足機迷一嘗PS3心願，現場有超過110部PS3試玩，全配備SONY高清電視，當中入場必玩係《GTHDConcept》。同場更上演「郭富城鬥GT之父山內一典」，郭富城揸唔完就Gameover，而GT之父仲大鑊，頻頻炒車，喂你設計喎，咁都玩唔掂？我哋設計咗一個4小時嘅買機行程，等你唔使盲摸摸嘥時間四圍行。

記者：許福合攝影：譚盈傑、陳偉強

●現場一期提供有800部PS3，不過要預先攞籌。

●辛辛苦苦排隊，記得檢查各種配件，先至搬PS3返屋企。

●買完PS3，記得保留收據，買滿$1,000SONY產品，可試玩40吋電視兼OSIM按摩PS3，價值超過60萬。

●連機舖遊戲都搬到AGS，可以一班跑吓馬仔。

●Xavix係一個紅外線體感遊戲，可以打保齡球、網球，玩法似足Wii最近隻《WiiSports》，售價$698（遊戲$498起）。

●紅白機鬧鐘跟6盒可換鈴聲。$128

●6呎咁高嘅三一萬能俠，一定要同佢影相。

●打得肚餓，最抵係雞蛋仔，未夠飽，可以試吓墨魚丸，一盒$15。

●銀版PSP會在AGS正式發售，會場特別安排一名銀版美女，周圍宣傳，真係唔玩得都嚇得！

●行到呢度，唔使同人逼，拎部PSP出來，免費經無線網絡下載遊戲試玩版。

雖然《GT5》未有正式推出日期，不過前傳嘅《GTHDConcept》由售賣版變成免費下載版，一樣成為會場焦點，連新任金馬影帝兼代言人嘅郭富城亦忍唔到手，上場要同GT之父山內一典鬥番場。
估唔到係GT之父原來技術都係麻麻，由頭炒到尾，難怪賽後大讚郭富城，話佢第一次玩都揸得唔錯，而郭富城更透露原來有10年GT車齡，絕對唔係新丁！

●GT之父手車真係好一般，真車一定炒到變廢鐵。

排30分鐘有得揸

大部份入場機迷，首要目標都係一試AGS實活，難怪成為全場熱點，一般都要排15-30分鐘先有得玩！
現場設有10架遊戲車，雖然唔及體感車廂，不過用軚盤玩亦好有賽車Feel，奉勸各位PS3機玩家買機錢絕對唔慳得，記得買個PS3軚盤去歎《GTHDConcept》，現場就有機迷玩得太興奮，連軚盤都扯甩！現場示範版本基本上同網上版一樣，睇機迷落場砌番幾轉，淨係睇軚盤真係同真車無分別，配合高清靚景，玩落令人更期待《GT5》！