今年主要低調賣薄扶林貝沙灣第三期嘅盈大地產，因為嚟緊有新期數推出，所以近排開始有搞作，好似啱啱就搞咗個慰勞宴，話要獎勵吓美聯物業喺貝沙灣租務上有好突出成績咁話，但係啲租務全部係二手，同盈大一啲都冇關係，盈大夾硬搞，實在有啲名不正，言不順。
而且，個餐仲係喺自己地方……貝沙灣會所入面搞，食咗乜落肚，蘭西就真係唔知嘞，如果行政總裁李智康喺度嘅話，我諗就唔會差嘅。
美聯執董陳坤興就話，其實係盈大今年5月同各大代理搞嘅貝沙灣租務比賽，直到上個月底連續7個月美聯都係成交最多，佔全個市場458宗裏面嘅七成，所以盈大今次咪筵開7席招呼佢哋一班同事，仲送咗12支法國香檳㖭。
另外，最近澳門樓市又翻生，香港代理喺澳門都搵到唔少，好似利嘉閣上個月喺澳門嘅佣金收入就差唔多1000萬，公司當然識做，攞番少少做花紅派畀後勤同事啦，每人有500蚊㗎。