選舉委員會選舉，塵埃已定，左丁山最唔滿意投票率甚低！只高過27%少少。教育界的老師平時教學生公民意識，但輪到自己去投票嗰陣，只得21.85%投票率，共一萬七千二百二十三人，其他六萬一千幾人去咗邊？入咗馬場？打麻將？飲茶？還是備課改簿？左丁山最緊張跑馬，當日（十二月十日）晨早就起身，趕去投票站，投票後先至入馬場睇「國泰航空香港國際賽」，啲老師唔係起唔到床吖嗎？衞生服務界投票率重肉酸，得16.16%，啲護士唔知去晒邊。
左丁山對教育界投票率之低，最感失望，因為讀書人自動放棄投票權利，實在有愧於學生，咁多老師唔去投票，如何教育我哋下一代嘅選舉意識？學生上課應該舉手問老師：「你有冇去投票？如果冇去，究竟點解！」睇吓啲不投票老師如何下台。
當然有人（如梁國雄）認為小圈子選舉，唔值得參加。呢樣係僵硬想法，值得批判。大家都知黨中央唔會輕易答應全面普選，香港人須一步一步咁去爭取，爭取方法包括踴躍參加選舉，踴躍投票，假如每一次選舉都有80%-90%投票率，儍人先至會話香港市民對政治冷感，民主選舉可以慢慢嚟。選委會雖然係小圈子選舉，但好幾個界別（如教育界、醫學界、高等教育界、法律界、會計界等）跡近一人一票，而呢幾個界別嘅選民都係「讀過書之人」，佢哋如果以身作則，熱烈投票，選到一啲泛民主派加入選委會，爭取民主聲音走入建制，肯定會產生政治壓力嘅。
如果視之為小圈子，杯葛之，建制派輕鬆當選，選委會內完全冇民主派聲音，你估可以產生好結果乎？唔好咁儍啦。𠵱家好玩嘞，泛民主派不再杯葛，立即可以有足夠票數選梁家傑入閘與曾先生跑番一場馬，雖然贏嘅機會小，但開跑前會十分刺激，令曾先生不敢怠慢，單係特首選舉過程已經係一課好好嘅民主教育，對爭取普選行前了一步。