李二少澤楷賣唔成8號仔後，除咗入咗真主黨──即係真正民主黨（兼響小圈子選舉勝出），同埋增持8號仔，真係好似冇乜點move。
不過，佢旗下各業務單位就冇停過，好似呢頭mobile推出MOOV樂手機服務，下個禮拜一又再整單大製作，破天荒集齊13間大唱片公司嘅單位領導，同大家分享全港第一個「網上音樂 無限聽 無限睇」音樂服務MOOV嘅成績！屆時，8號仔另一巨頭電視業務MD梁德昇，就會負責解畫咁啦！
嗱，唔好問到時有冇歌星睇咁膚淺，有志成為歌星or明星嘅，應該趁呢幾日錄番隻dummy，嗰日着靚啲下晝五點去到IFC亮明居，然後搵位sell畀班唱片公司高層，再唔係，如果淨得個樣唔唱得都冇問題，到時記得搵機會響昇爺面前行來行去，話唔定有機會響now做主播㗎！
前後4次增持
講番二少增持，查實由12月1號起（單刁喎咗翌日），佢已經即刻做嘢，掟2億增持4100萬股，輾轉到12號，再用1001萬增持208.7萬股（或0.03%），令持股量增加到27.2%，距離全面收購觸發點又近咗一大步，前後4次增持，大約使咗2.51億。
做咩要增持？坊間有好多傳聞，但人哋二少講過對8號仔有信心嘛，估咩呢，咪當佢響度證明自己囉！