時間啱啱好，昨日叫大家做好兩手準備，揀定啲指數輪，等恒指突破橫行區就定番個止蝕位飛身入去買，昨日港股借外圍造好挾上，開市就裂口一躍而上，好輕鬆就升越20日線，企喺19110收市，升191點，點解唔抽高啲？淡友都頂得好實，不過唔係還擊嗰隻，睇嚟係且戰且走，632.2億元成交絕對唔係講玩，好友掌握局勢，梗係唔使急，下個禮拜挾多一兩日，好多淡友都要投降。
大家都應該有聽過「借力打力」，個市喺低位橫行，只要跌多少少，或者吹一個利淡消息，情緒就會變得悲觀，乜嘢聖誕鐘、乜嘢新年例旺都唔會令人動心，不過，個市挾600幾億元成交重越19100，就唔係咁話嘞，投資者習慣咗聖誕節同聖誕老人攞禮物，下個禮拜個市再升，大家會睇到好多散戶盤跟入，力量就會變得好大，好友要推個市上去就容易好多，咁嘅環境，人人都識得惜售股份，需求大、供應少，你話個市會點？
早幾日叫大家留意國內保險股異動，轉個頭全部炒上嚟，國壽C輪2178應該仲有排升，其他嘅保險股C輪都可以諗吓。
中財險C輪9827：中財險（2328）昨收3.29元，升5.7%，大成交支持升破咗10日同20日線，破咗3.4元睇3.7元。隻C輪9827昨收39仙，槓桿率8.4倍（有效4.7倍），對沖值0.55，正股升上3.4元，9827會喺45仙水平，正股升到3.7元，隻C輪應該唔會平過63仙，呢個價買啲，正股跌穿3.16元止蝕。
俊樺