【廣州直擊】金牌娛樂噚日喺廣州舉行記者會，宣布將該公司旗下嘅唱片內地發行權交晒畀泰盛文化。噚日金牌一哥古巨基率領方力申、側田、吳雨霏（Kary）同鄧麗欣（Stephy）出席撐場。
增加資源
記者會上，眾歌手先後上台獻禮，古巨基送財神，方力申就送木盤話賺到盤滿缽滿，Kary同Stephy送咗個槌，寓意兩間公司合作後可以成功打擊翻版，點知側田竟然話：「翻版係解決唔到㗎，做生意我就唔識，都係做自己嘢啦。」
楊千嬅最近轉投東亞唱片，如今一姐之位懸空，Stephy話：「我年紀細，做一妹。」Kary話遲啲先諗，方力申就好坦白話：「佢（千嬅）走咗我都有啲唔捨得，不過對公司剩低嘅歌手嚟講係好事，可以分番多啲資源出嚟。少個師姐喺度，可以加速我哋成長。」另一方面，千嬅噚日去商台接受訪問，對於被指威脅唔到衞蘭嘅一姐地位，佢話：「人生當中要比較嘅就係同自己，一間公司有實力同好歌手，我都引以為傲。」
