陳敏之自從和揚明分手後，鮮有傳出緋聞。早前她被雜誌拍到與貌似黎明的年輕才俊薛先生約會，可是她卻強調彼此僅屬朋友關係。自認感情生活很dry的陳敏之揚言來年只以飛躍進步女藝員獎為目標，暫無暇談情。
陳敏之現時忙於拍攝無綫處境劇《高朋滿座》，預計來年3月才拍完，難怪她稱現時要專注工作，戀愛事暫時拋諸腦後。
工作狂難抽空
早前陳敏之被雜誌拍得與一名貌似黎明的年輕才俊薛先生約會，因而傳出緋聞，不過陳敏之強調彼此僅屬朋友關係，她說：「我好鍾意做嘢，無論點都唔會放棄工作，我可以話係一個工作狂，就算讀書時喺學校我都係活躍分子。」
自從與揚明甩拖後，陳敏之似乎未有新戀情，她笑言很享受單身生活，但有時也會感到很dry，不過家人也不贊成她只顧拍拖。陳敏之說：「之前屋企人見我分手好傷心，所以就話叫我最好做嘢先，除非我係想結婚啦！我都覺得拍嚟做乜呢，就連我身邊嘅女仔朋友都話需要男友，佢哋仲猛叫我介紹㖭，所以我都冇乜機會可以識到男仔，大家都怕咗我喇。」
不甘台慶陪跑
對於今年的工作表現，陳敏之覺得仍有進步空間，不過她已訂下目標，寄望明年發力做到最好，她說：「雖然之前都試過提名飛躍進步女藝員獎，但次次都係其他女同事攞，我都戥佢哋開心，不過我都好想攞，希望下年會好啲，令人有耳目一新嘅感覺，當然攞到就要加油，但一切隨緣啦！」
採訪：駱華齡 攝影：陳志嵐
場地提供：Suite,GatewayHotel(RM)
化妝：KhakiofMaeVonMakeup
髮型：DYofHairCulture
服裝提供：LaneCrawford
