年尾係頒獎季節，噚日地產代理監管局，就搞咗個「持續專業進修計劃」頒獎典禮，場面都幾墟冚。
聽地監局主席潘國濂講，05年5月推出「持續專業進修計劃」，目的係鼓勵從業員增值進修，希望佢哋每年修讀至少10個學分，首階段於9月結束，總共有24656人次報讀，其中2532名從業員修滿10個學分或以上，獲發嘉許證書。
唔講唔知，得分最高嘅首10名，全部修滿70個學分或以上，其中第一、二名，更加分別修滿119及117.5個學分，咁勤力，真係值得大家畀多啲掌聲。
另外，地監局早排又為「持續專業進修計劃」搞咗個獎章設計比賽，結果持牌人組冠軍由中原地產奪得，亞軍、季軍就由美聯物業包辦。